Me ake tanada idan za a yi wainar shinkafa da miyar taushe?

YADDA AKE MIYAR TAUSHE

Uwar gida zata tanadi abubuwa kamar haka:

1. Cefane (Tattasai, Tumatir, Attarugu, Albasa)

2. Nama.

3. Mai (Fari ko ja)

4. Alaiyyahu ko Ugu ko shuwaka.

5. Spices.

6. Kabewa

Uwargida zata yanka cefane haɗe da ƴar tafarnuwa  da kabewa ta markaɗa, idan kuma bata buƙatar markaɗa kabewar zata iya datsa ta ƙanana, idan an kawo markaɗen ta haɗe su wuri ɗaya. Sannan ta tafasa namanta  haɗe da maggi da kuma spices, bayan ya tafasu, sai ta kwashe shi a wani kwano. Sannan ta zuba markaɗenta haɗe da mai ta soya, idan zata tsaida ruwan miya, sai ta haɗa da tafashen namanta, haɗe da ruwan jikinsa ta juye, sai ta ƙara ƴan ruwa, gwargwadon yadda take son yawan miyar.

Sai ta yanka alaiyyahu, ko Ugu, ko shuwaka, sai ta wanke su da gishiri saboda kashe ƙwarin da ke jikinsa, sai ta zuba a ruwan miyar, idan tana buƙatar egusi sai ta daka shi, ta haɗa maggi, da spices da albasa ta zuba a miyar.

Zata bashi ƴan mintuna kaɗan, da zaran miya ta yi, sai ta sauke.

Note: Miyar taushe mai kyau ana yin ta da kauri ne, idan ta yi ruwa tsururu, toh ba ta cika miyar taushe ba.

ABUBUWAN DA AKE BUƘATA IDAN ZA A YI WAINAR SHINKAFA:

1. Farar shinkafa (Shinkafar tuwo).

2. Yeast.

3.Baking powder

4. Albasa.

5. Maggi (Fari)  & Gishiri

6. Sugar (Optional)

Da farko Uwargida zata wanke shinkafarta, sannan ta jiƙa ta, a bangare ɗaya kuma zata ɗebi ƴar kaɗan daga cikin Shinkafar ta dafa, misali a cikin Wainar rabin kwano, zata iya ɗibar gwangwani (Kwanko) ɗaya ta dafa. Sai ta haɗe ta da waccan da jiƙa a wuri ɗaya ta yamutse, sannan ta kawo yeast ta zuba, sai  ta yi blending, ko kuma a kai mata markaɗe (Amfanin saka yeast kafin a kai markaɗe shi ne, zai shiga cikin ƙullun sosai, saɓanin idan bayan markaɗe ne zai dunƙule, ba zai ratsa ƙullun sosai ba).

Toh bayan an markaɗo, sai uwargida ta rufe wannan ƙullu, ta kawo shi cikin rana ko kuma wuri mai gumi ta ajiye. Idan ƙullun ya tashi, sai ta ɗan zuba bakin powder kaɗan, da maggi da gishiri, sai kuma ta yanka albasa ƙanana a ciki ta motse, dama tuni ta tanadi tanda da mai, sai ta hau tuyar waina.

Idan kuma mai sugar ce take so, toh banda Maggi zata saka, zata zuba gishiri da suga kowane average, bayan ta motse, sai ta cigaba da tuya.